政情：首參與鄉議局會議 黃永光搵侯強集郵
香港青年聯會副主席黃永光上月尾獲委任為新界太平紳士，自動成為新界鄉議局當然議員，可以參加鄉議局每月一度嘅執委會，而尋日就係黃永光首次參與執委會。佢除咗坐定定開會外，更主動搵上水鄉事委員會主席侯志強（侯強）集郵添！
初嚟埗到嘅黃永光準備咗蛋糕做見面禮，而佢離開時仲好興奮去搵侯強，好似小Fans要求合照添！佢就解釋，太太經常睇電視見到侯強，講起新界都會諗起佢，所以就特登合照拎番去畀太太睇喇！
覺得感覺親切
鄉議局開會經常出現火花四濺嘅場面，黃永光首次參加執委會，反而覺得感覺親切，而且講嘢夠直同坦誠，仲大讚高效率添！佢仲話感受到一班鄉紳嘅齊心，因為大家純粹為新界人利益出發做事，睇嚟鄉議局畀佢嘅印象都幾好喎。
另外，屏山鄉事委員會主席曾樹和講起空置鄉村校舍用途時就鬧爆南亞裔，更炮轟政府對南亞人士福利比原居民更好，擔心原居民將來被搏命生小朋友嘅南亞裔取代喎。