特衰政府成日話有「理財新哲學」，講到懶勁咁，其實說穿咗就係四個字：「應使唔使」。當政府需要使錢喺市民身上就孤孤寒寒，使錢喺啲唔等使嘅項目就慷納稅人之慨，呢種亂咁用錢嘅理財態度，叫「理財大花筒」就差唔多。
呢，港府舊年向立法會申請四億元撥款，興建一條橫跨柯士甸道西嘅西九文化區藝術廣場半開放式行人天橋，咁貴起條天橋梗有反對聲音啦，所以民政事務局尋日提出新方案，簡化設計，令天橋造價降到二億八千萬元，足足減省咗三成成本。土木工程拓展署仲話，新設計將行人天橋嘅長度縮短咗約十八米，支柱數目減少咗，建造費慳唔少之餘，天橋嘅闊度同橋身仲可以有空間上嘅變化，可以配合唔同活動喎。
睇到喇，政府就係咁鍾意好大喜功(口架)喇，起條天橋都要有咁豪得咁豪，無非貪靚之嘛，結果畀人話兩話即刻褪軚，成本隨即大幅下降，慳咗成一億二千萬元，證明天價天橋根本不必要。你話喇，如果一早提出兩個方案畀人揀，就唔使拖延成年開會復開會，無形中推遲天橋落成時間喇。
難為民政事務局代表仲話自己「應使得使」，簡直唔知醜字點寫。好心喇，呢個政府出名嫌貧愛富，洗腳唔抹腳，對住窮人就撳實荷包，叫佢全民派錢，就話要審慎理財，轉個頭就起條大白象行人天橋，胡亂揮霍納稅人嘅血汗錢。應使得使就見唔到嘞，刻薄基層為自己面上貼金至真。
講到政府大花筒嘅例子，真係三日三夜都講唔完，近有食環署喺偏遠垃圾站引入逾二十個太陽能廢物壓縮箱，每個盛惠三萬大元，係相同容量垃圾桶造價嘅幾十倍，仲要冇乜效果可言。遠嘅有大型基建超支再超支，淨係西九文化區已經赤字連連、超支不斷。至於民航處已故前處長擅自將民航大樓改建成私人行宮，更加證明港產官僚專係闊佬自己，孤寒市民。
講起西九文化區，納稅人真係一肚氣，起極都未起好唔在講，最弊係醜聞多多。好似港府成日迷信洋和尚會唸經，先後重金禮聘三個洋總裁，結果次次都搞出大頭佛，唔係上任冇耐就劈炮，就係行行企企食飯幾味。枉港府自誇西九文化區媲美西班牙畢爾包古根漢嘅世界級文化區，冇咁大個頭偏要戴咁大頂帽，都唔怕笑甩人哋棚牙嘅。
所以話，香港廢官當道，一事無成就係咁解。正如有人話齋，西九文化區地理位置優越，隨住高鐵通車價值勢必更高，既然港府搞極都搞唔掂，與其將地皮丟空曬太陽，倒不如用嚟起樓解決房屋問題冇咁嬲。