林鄭班子首份預算案，財爺陳茂波歧視性派發四千大洋嘅「補漏拾遺」，最終以四十三票贊成、十一票反對和八票棄權通過，雖說棄權票五年最多，過程總算「和諧」，甚至在「大和解」的氛圍營造下，更贏得泛民三票支持添！當然，呢個「史上最離譜」嘅預算案，民調指不同群組的不滿意率曾一度高達百分之五十八。政府本年度盈餘逾千億，庫房水浸，政府被形容為「肥到肚腩遮住腳趾完全着唔到襪」，可是政府一味守財奴心態，一開始不聽主流民意全民派錢，最終不派不派還須派，美其名「補漏拾遺」，實質係跌落地揦番拃沙！
陳茂波睇怕係「阿茂整餅」嘅傳人，冇嗰樣整嗰樣，一個所謂「補漏拾遺」方案，補到天殘地缺，單是行政費已逾三億元，受惠人數又減半，申請又繁複，不少市民至今仍然充滿疑惑，究竟何時才可攞到呢四千大洋？老朽內心納悶：明年春暖花開家鄉豬正肥時應該有喇？真係天知曉！
咁廢嘅預算案都可以通過？正如有人話齋，正正是全靠建制派含淚硬撐加埋反對派曲線支持，絕對唔代表市民收貨！一個「還富於富」的預算案，一個睇唔到「投資未來」的預算案，講到尾，都幾廢噏！本屆政府施政理念講就天下無敵，甚麼「新思維」、「理財新哲學」。講出來勇武到嚇死寶寶，然一節見而百節知。
早前政府統計數據顯示，香港大專學歷或以上在職貧窮人數，於短短幾年間增約一萬人。政府扶貧無方，以前是七個港人一個窮，家陣係五個港人一個窮。年輕人就算肯捱，唔去日本唔入戲院，不吃不喝逾十九年才能買一個納米窩居，居住空間比監獄仲差，你話年輕人唔抑鬱都算強人喇，仲搞乜鬼創新科技啊！林鄭話要與青年同行，做好「三業三政」工作：三業即學業、置業及事業，三政即議政、論政和參政。唉！陳義過高，時間證明純屬廢噏。