立法會財務委員會主席陳健波（波哥）尋日主持第一節會議後，有事趕住走，所以交棒畀財委會副主席田北辰（田二少）主持餘下嘅會議。不過交棒時發生小插曲，事關波哥喺咪都未熄嘅情況下，同立法會秘書交代話，田二少冇乜信心，叫佢主持埋選舉事務處開位先好走。波哥對田二少唔信任已唔係第一次，上個月佢又係主持財會中途要離開，叮囑議員畀田二少「一半」支持，事後佢解釋話想講「一貫」而非「一半」喎！既然波哥對田二少咁冇信心，咁就唔好成日開會開到一半走咗去啦！
