政情：蒙德揚：台立法院亂 港立會更亂
港九電器商聯會（聯會）一行十多人尋日到訪立法會，聯會主席蒙德揚（David）、永遠榮譽主席朱嘉樂同會長李子良都有去，由批發及零售界立法會議員邵家輝負責接待。David話經常有留意政治新聞，以前睇電視睇到台灣新聞，成日都笑台灣立法院亂七八糟，但係依家香港嘅立法會更加立立亂，搞到佢都唔好意思再笑人咁話。
David話，依家立法會有好多具爭議性嘅問題，想唔睇立法會新聞都唔得。其中好多議題都同民生息息相關，好似前日通過咗財政預算案，佢都好開心，因為業界一啲工程如冷氣安裝等都將會明朗化，咁樣大家都唔使擔心冇糧出。
話議員唔應該為反而反
對於依家啲議員開會時動輒就衝擊會議，令會議暫停甚至腰斬，David就認為，議員唔應該為反對而反對，政治係「give and take（施與受）」，香港唔可以停滯不前、冇進步喎。