政情：愛女畢業旅行 劉黃寧達跟埋去
對唔少父母嚟講，「吾家有女初長成」既係喜悅，亦有煩惱。珠寶設計師劉黃寧達（Leta）最近就初嘗呢種滋味，事關佢十七歲嘅寶貝女兒Katarina就嚟高中畢業，Leta會飛去英國參加畢業禮，然後同個女去法國玩幾日。不過兩母女住同一間酒店卻唔同房，個女仲約定旅法行程唔預媽媽玩，究竟搞邊科？
Leta笑笑口話，其實今次係Katarina同四位女同學嘅畢業旅行，佢擔心法國唔安全，所以想跟埋去，但囡囡唔畀。後來有位朋友同Leta獻計話，父母對未夠十八歲嘅子女仍有照顧看管嘅法律責任，最終成功以此理由說服女兒畀佢去，不過為期五日嘅少女行程就唔預媽媽參加喇！
趁機搵朋友敍舊
Leta都明白Katarina大個女，想獨立，笑稱可以近距離睇住已經好開心。所以今次佢會趁機搵多年唔見嘅朋友敍舊。天下父母心，真係幾偉大。