政情：預算案6票4立場專業議政同床異夢
財政司司長陳茂波交出嘅今屆政府首份財政預算案備受批評，前日最終都喺立法會獲得通過。不過今次投票支持預算案嘅唔止建制派，民主派陣營專業議政其中三名議員都投咗贊成票，包括會計界梁繼昌、資訊科技界莫乃光同衞生服務界李國麟。好笑嘅係，專業議政共有六位議員，除咗三票贊成，其餘三位議員包括法律界郭榮鏗、教育界葉建源同社會福利界邵家臻就分別投票反對、棄權同離場不投票。六票但有四種立場，可以話係同床異夢，「團結」程度仲衰過議會陣線。
朱凱廸暗批為政敵錦上添花
睇番預算案投票取向，民主派各黨派都跟番「隊形」，好似民主黨七名議員全數棄權，公民黨（公文袋）四人亦全數反對，就連集合香港本土、人民力量、街工多個政團嘅議會陣線，都全數六人投反對票。唯獨專業議政出現六個人四種立場，贊成、反對、棄權、離場不投票乜都齊。
本身係議會陣線一分子嘅議員朱凱廸尋日就仲喺社交網站批鬥，不點名指民主派有三人投票支持預算案，對於一份評分極低，畀人由頭鬧到尾嘅預算案，民主派議員取態令人憂慮，質疑民主派議員係咪應該因為個別財政要求得到答允，而為政敵「錦上添花」云云，矛頭直指梁繼昌、莫乃光同李國麟。
莫乃光就話，佢同梁繼昌過往亦多次投票支持預算案，唔同板塊議員有唔同支持者，所以有唔同立場好正常，亦證明佢哋係有獨立思考咁話。
同時係公文袋黨員同專業議政成員嘅郭榮鏗就跟隨公文袋投反對票，有專業議政成員質疑佢但凡有重要議案，就會跟隨公文袋路向，小事先跟從專業議政，有「大細超」之嫌。不過郭榮鏗就辯解話，專業議政並非政黨，大家可以自由投票。被問到如果公文袋同專業議政日後立場有異會點做，佢就話啲重要議題如高鐵一地兩檢等，睇唔到有咩分歧喎。
而葉建源同邵家臻就話，事前已知悉專業議政其他成員投票意向，佢哋唔係政黨，就算各人有唔同意見都會互相尊重。邵家臻更笑言，完全唔介意被批評佢哋冇隊形，仲樂見此事添。佢哋六人雖然投票立場各異，但口脗似乎又幾一致噃。唔通同床異夢、各行其是先至係專業議政嘅宗旨？