中環出更：雅舒瞓身畫畫搞到頭暈叫白車
香港不時被批評為文化沙漠，更經常有人話搞藝術等於乞食，但唔少藝術愛好者仍然少理，繼續瞓身搞藝術。由香港各界文化促進會主辦嘅一個書畫名家藝術展尋日舉行開幕儀式，執行會長馬浩文、副會長雅舒都有出席。有作品展出嘅雅舒就自爆，試過畫畫時要叫白車入醫院，咩事咁瞓身呢？
原來雅舒鍾情中西合璧、有別於傳統畫風嘅水墨畫，所以佢用嘅顏料有啲塑膠成分，如果創作時長時間吸入會影響身體。佢就試過畫到唔舒服，最後要叫白車送院添！佢笑稱唔知係吸入過量，定係畫得太興奮而頭暈喎！雅舒又話，曾經有人同佢講搞藝術會餓死，但佢就視藝術為生命必需品，直言同呼吸一樣，冇咗都會死。而且創作都可以當係周記咁，作為人生嘅紀錄！
傅曉琳同街坊齊學油畫
同場仲有其他與藝術相關人士，好似徐悲鴻藝術委員會秘書長廖鴻華，立法會議員劉業強同離島區區議員傅曉琳（Sammi）都有到場支持朋友。Sammi自言無藝術細胞，從未試過因藝術而獲獎，不過近年就開始舉辦油畫興趣班，同一班街坊齊齊上堂學油畫喇。
至於馬浩文就同藝術關係密切，小學時畫畫曾經攞獎，而爸爸唔止擅於畫畫，更係一名雕塑家，精通木雕技術，現時屋企亦有保留爸爸嘅作品。佢話爸爸當年將雕刻技術用於製造玩具模具上，先可以生產到更仔細同精緻嘅玩具，真係活用其手藝喎！
卓妮