香港早幾年有句道路安全口號：「路上零意外，香港人人愛。」不過近年香港交通意外頻生，死傷枕藉，唔怪之得呢顆昔日明珠，家陣唔止黯淡無光，直頭連台灣遊客都話憎啦。
呢，之前大埔十九死車禍之後，政府成立咗個香港專營巴士服務獨立檢討委員會，佢哋尋日搞聽證會，出席嘅運輸及房屋局代表承認，近五年涉及專營巴士嘅交通意外每年高達二千二百宗，即係平均每日有六宗，難為運房局仲話一直盡力改善專營巴士安全，面皮真係厚過巴士車轆呀。
意外嘅嘢，本來一宗都嫌多，何況過去五年巴士意外造成死傷人數超過一萬一千人，撞碎咗唔少家庭嘅幸福！之所以搞成咁，其中一大因素係部分司機駕駛態度同心理質素的確係出咗問題，好似大埔車禍入面嗰個被乘客鬧完，於是報復性掟彎飛車嘅司機咁，九巴近日拍片教司機點樣處理惡客喎，做番好啲員工培訓仲實際啦。
唔使講咩，有前九巴員工爆料指九巴唔單止解散咗負責安全質量嘅部門，仲削減埋車長嘅訓練資源，將四部訓練車長用嘅駕駛模擬器報廢，又將新員工訓練日數大減一半，同埋只要車長肯簽份文件，聲稱自己熟悉要揸嘅新路線，就唔使再派教練跟車評估。巴士公司用埋咁多節流手段，即係變相罔顧行車安全，攞乘客生命較飛啫。
話時話，政府對巴士公司嘅監管亦都只係得把口講，依家只係有就巴士司機嘅作息時間制訂指引，不過冇立例硬性規管，司機工時長問題冇改善，又攰又冇精神，遇到緊急情況都冇法及時反應啦。有人話巴士司機揸住嘅唔止係軚盤，仲係全車人嘅性命！一啲冇錯o架，呢個「無為」政府與其成日以「自由市場」做偷懶嘅擋箭牌，倒不如防患於未然，否則整幾多個檢討委員會，吹完一大輪水，然後冇實際嘢做到嘅，都係冇用o架咋。
講真，政府道路設計問題多多已經成日被人詬病，加埋路牌指示唔清晰，有啲又被大樹遮住，絕對係陷阱處處，遇上人多路窄，加上近年唔少駕駛態度同水準參差嘅司機，既有剷上石壆攝位爬頭，亦有迴旋處逆線繞圈，都咪話唔險象環生，同死亡之路冇分別o架，你話做乘客點會唔牙煙呢？
都係嗰句，「馬路如虎口」，不過老虎都係一次咬一個人啫，巴士出事，死傷就嚴重得多。其實，香港何嘗唔係一架大巴士，被技術渣斗嘅庸官亂咁舞，搞到「日日出意外，香港真悲哀」，車毀人亡都係遲早嘅事咋。