政情：公民講場：冇麵粉焗包 黃遠輝叫人催政府搵地

房屋供不應求，政府特別成立咗土地供應專責小組，暫時研究緊十七個土地嘅選項可以點用。有啲意見認為專責小組應該先討論土地分配，而專責小組主席黃遠輝尋日就喺網誌回應，話喺冇增加麵粉供應之前，開始討論烘焙乜嘢麵包實在有啲本末倒置，若果連基本嘅材料都冇或者來貨唔穩定，計劃點樣分配都只係空談。講到咁，黃遠輝擺明就係話畀外界聽，唔好難為專責小組呢個廚師嘞！而佢嘅潛台詞就係搵地係政府嘅責任，唔該先追政府呢個麵粉供應商先。