政情：梁栢賢變奇異博士 大講基層醫療
公營醫療系統服務供不應求嚴重「爆煲」，連醫院管理局行政總裁梁栢賢（PY）亦要化身漫畫英雄，用超能力救病人！尋日醫管局一年一度研討大會開幕禮，焦點再落喺PY身上。PY繼舊年Cosplay寵物小精靈卡通人物「小智」，今年變身成為火熱嘅漫威英雄，由「Dr. Leung」變成領頭級一線英雄「Dr. Strange」（奇異博士），觀眾笑聲不絕。
展示老咗10年P圖
醫管局大會以基層醫療為主題，PY提到醫管局最具挑戰任務是人口老化和慢性疾病問題。PY又展示自己一張貌似老咗十年嘅P圖，圖中笑到十萬咁口打麻雀，更拉埋各聯網總監落水將大家P做「雀友」，咁大整蠱嘅原因係想帶出人口老化同長期病患問題。
佢提到香港有百分之八十嘅長者死於長期病患，有趣嘅係，雖然長者人口增長遠高於其他年齡組別，但長者同非長者患慢性疾病人數增長均相若各有百分之五，原因歸咎於現代人生活飲食唔健康兼太懶、少運動，「就連閂個燈掣都要用Siri」咁話。未來醫管局朝着大數據同科技發展，例如不斷優化「智友站」等手機應用程式，最終目標做到實時醫療支援服務，令長者安享晚年，在家打住麻雀開心食藥「happy aging」。
早前宣布不續約的PY咁鬼幽默，睇來繼任人在以後的大會致詞上要有突破都幾有難度！但PY提提大家，佢預料最快會喺明年七月先離職，即係下年大會仲有機會同大家見面。