政情：劉聖雪落區「瞓到最後一秒」
近年政壇捲起美女旋風，新民黨繼捧起號稱「法律界桂綸美」嘅容海恩進身立法會後，曾參選港姐嘅劉聖雪（Dana）亦勢將喺下年年底嘅區議會換屆選舉中出戰，而佢依家正喺港島東嘅康山做地區工作。本身住喺康山嘅Dana講笑話，作為當區居民嘅優勢係「可以瞓到最後一秒鐘」先落區，宣傳物品亦可放喺屋企，最重要嘅係知街坊需要。
自言唔介意被人形容為花瓶嘅Dana話，一五年選美時學嘅Cat Walk（貓步）已經唔記得晒，依家淨係記得準時落區，嘗試認識每個街坊。距離區議會選戰仲有一段時間，Dana趁選戰前哨戰未打響，打算近期去一轉韓國首爾，同韓國嘅聯繫嚟自喺美國讀書時嘅韓國室友，「嗰時兩個人一齊住寄宿家庭，有乜嘢事都互相照顧，感情好好」，佢曾經要求室友教韓國粗口，但係對方唔肯，後來兩個人都決心練好英文，所以就無咗學韓文呢回事。
款式吸睛 袁彌昌韓國買衫
另外，同樣嚟緊會去韓國嘅仲有新民黨政策總裁袁彌昌，但佢就笑言唔係同Dana一齊去，話唔想再多個「緋聞女友」。而袁彌昌去韓國嘅目標係買衫，話覺得韓風款式夠吸睛，不過近年韓式嘅男士打扮，尤其是髮型，就愈嚟愈誇張，袁彌昌就強調只欣賞啲衫，至於髮型就「不了」。