政情：教育政策亂 楊潤雄評分急挫 做唔做都錯

「提升教育質素」跌幅最大

香港研究協會喺四月二十四日至五月三日成功訪問咗逾千名十八歲或以上嘅市民，評分以一分為非常不滿意，五分為非常滿意，而政府九項施政評分悉數下跌，並創下今屆政府紀錄新低，當中「提升教育質素」嘅評分，跌幅最大，由上次調查嘅二點六四分跌至二點四八分，下跌○點一六分。

對於住屋問題，調查結果發現「紓緩房屋問題」嘅評分亦再次創新低，由上次調查嘅二點一八分跌至二點○五分，下跌○點一三分，跌至榜末位置，調查機構認為評分反映大部分市民對政府嘅房屋政策感到失望。

問責官員嘅評分亦大部分創新低。特首林鄭月娥嘅評分下跌○點一二分，只有二點六四分，而政務司司長張建宗亦下跌○點一一分至二點六○分，財政司司長陳茂波亦下跌○點一一分至二點○八分，三人的評分亦係上任以來嘅新低。至於十三名問責局長嘅評分亦悉數下跌，並創本屆任內新低，其中楊潤雄嘅評分跌幅最大，下跌○點二二分至二點四○分，而民政事務局局長劉江華的評分亦下跌○點一三分至二點一八分，排喺榜尾。

調查機構嘅負責人指出，政府施政同大部分問責官員嘅評分創下任內新低，反映市民對政府問責團隊的觀感變差，並敦促政府及問責團隊正視市民的評價，深入了解不同階層人士的需要及期望，就社會最關注的議題採取應對措施。

教科書用字風波惹爭議

點解楊潤雄嘅評分跌幅咁大？調查機構相信同最近教科書用字風波有關。之不過，近期有關TSA復考，又再引發爭議，而新高中核心科之一嘅通識教育科近年爭議唔少，教育局轄下學校課程檢討專責小組正檢討通識科嘅考核方式，又會研究通識科係咪由必修科變做選修科，搞到滿城風雨。做又錯，唔做又錯，係咪坐教育局局長呢個位嘅人都打破唔到宿命呢？