中環出更：巴西靚女多 何啟明避開「睇肉團」
香港嚟緊呢兩年都係選舉年，明年係區議會選舉，後年就到立法會選舉，一眾「雙料」議員要放假鬆一鬆就要趁今年暑假休會喇！但身兼觀塘區議員嘅立法會勞工界議員何啟明就畀太太同個仔「掉低咗」，冇得齊齊去法國玩。反正巴西「睇肉團」都未夠人，不如報名喇？但何啟明耍手擰頭咁話唔敢去。唔通佢怕當地治安唔好？佢竟然話係巴西靚女多，佢都係「避得就避」嘞！
何啟明話同屬工聯會嘅議員黃國健（KK）以前行船都去過巴西，KK就同佢講過話巴西好多靚女，佢呢啲已婚人士要小心，所以搞到佢唔敢去巴西，加上覺得今次立法會呢個視察當地肉類進出口情況嘅巴西「睇肉團」只得幾日時間，但就搭咁長途機，所以決定唔去。
鄺俊宇搞「一日遊」 助盲伯伯散心
元朗區議員、立法會議員嘅鄺俊宇（Roy）就話，自從做咗「雙料」議員之後，實在忙到好少去旅行，就算立法會嚟緊放暑假，佢都要搞啲地區工作。不過，阿Roy都唔係完全冇去玩嘅，近年就經常搞啲「一日遊」，仲帶咗好多長者去。一問之下，原來係因為有次一名失明嘅伯伯參加咗「一日遊」，因為佢睇唔到嘢，出街唔方便，搞到照顧佢嘅老婆都出唔到街，所以就參加「一日遊」等自己可以出去行吓，而佢老婆亦可以放吓假，一舉兩得。阿Roy聽完就發現原來「一日遊」都可以意義重大，所以近年幾忙都堅持搞。至於去遠啲嘅地方旅行，佢就話暫時都未有打算喇！
之不過，身兼行政會議成員、立法會議員同中西區區議員「三料議員」嘅張國鈞，已安排暑假同囡囡去泰國同澳洲。仲行得開？佢話因為復活節甩咗底，所以要補償番畀兩個女喎。至於工業界吳永嘉就話去旅行最緊要開心，又話自己百毒不侵，去旅行從來唔打防疫針，牛肺刺身、生蟹、內臟乜嘢都敢食。雖然佢咁講，不過正所謂病從口入，都係小心啲好。
卓妮