中環出更：嫻姐爆好姊妹結婚唔見戒指
結婚係唔少人一生中最難忘嘅事，婚禮更係不容有失。不過婦女事務委員會主席陳婉嫻（嫻姐）早前喺一個晚會上就爆料話佢嘅「好姊妹」、工聯會榮譽會長林淑儀，當年同進出口界立法會議員黃定光（象哥）結婚時唔見咗戒指，嗰隻戒指仲要係象哥嘅媽媽送畀林淑儀嘅家傳之寶添，好彩最後都搵得番咋。
嫻姐與林淑儀及象哥係多年好朋友。林淑儀早前喺工聯會嘅晚會上講起，當年同象哥結婚，嫻姐做佢姊妹。嫻姐即時大爆，佢哋大婚當日一度唔見咗隻戒指，真係搞笑。
七十年代已經識嫻姐、聲稱識嫻姐仲早過識太太嘅象哥就話，嗰隻戒指係鵝蛋玉鑲鑽，塊玉綠得好透，好彩後來喺車入面搵番。依家太太已經將隻戒指鎖喺夾萬，佢仲講笑話︰「我睇都冇資格睇」。
林淑儀又喺晚會上表演唱歌，但象哥周圍都搵唔到花送畀太太。林淑儀就問象哥：「KK（立法會議員黃國健）搵到（花）嘅？」象哥就答「我唔知佢喺邊度（搵到），佢話喺廁所門口呀」。此時，立法會議員麥美娟（Alice）就笑稱︰「有預感象哥今晚要跪玻璃，阿姐（林淑儀）唱歌佢都唔買定花，你西蘭花都攞棟上去啦象哥！」象哥即刻大呻，太太事先冇話畀佢知會表演，好似軍事秘密咁，又話之前聽到太太晚晚沖涼都唱同一首歌，都覺得奇怪喎。
容海恩係黃錦星師妹
環境局局長黃錦星同立法會議員容海恩（Eunice）就喺晚會相遇，原來Eunice係黃錦星師妹。黃錦星話，二人喺加拿大同一間學校讀書，Eunice讀學士學位，而佢就讀研究院。
黃錦星又話，母校係全北美最環保嘅校園，當年第一幢環保建築仲可以自給自足全幢大樓嘅能源同水添。不過Eunice竟然話，自己讀咗咁多年都唔知有幢咁嘅大樓喎。
卓妮