政情：百厭馬逢國 特登整沉龍舟
香港有唔少地方近海或河，夏天玩水上活動就最適合(口架)啦，立法會議員馬逢國早前出席中國香港賽艇協會活動時，講起玩水上運動令人好開心，話自己唔止玩過划艇，仲扒過龍舟，有時鍾意等隻龍舟過咗終點後，特登搖吓搖吓整沉佢，自己識游水，所以唔驚喎。唔通佢想乘機游埋龍舟水？
有玩划艇機練肌肉
馬逢國又話自己喺七十年代，約二十歲時都試過划艇，但就唔係正式比賽嘅運動員，有時都會同朋友去大尾督玩吓划艇，當年啲艇都冇咁靚，亦唔係咁多人玩，八十年代佢住喺城門河附近，成日望住賽艇協會喺城門河練習(口架)！其實佢依家都有玩吓划艇機，覺得同真正嘅划艇同樣練到hip位、腹肌等平時比較少用嘅肌肉，腰、腿、背肌，都要用好多力，玩完都幾攰喎。
除咗划艇、扒龍舟外，佢仲話以前閒時有去荔枝角扒艇仔。咁佢追太太時有冇用扒艇仔呢招呢？佢就話可能都有喎，但唔記得啦！