政情：着社民連Tee 區諾軒入咗黨？
立法會議員區諾軒自從去年退出民主黨（白鴿黨）後，佢將情歸何處、會否加入其他政黨一直都係大家估估吓嘅謎。社民連主席吳文遠尋日就喺社交網站上載咗一張同區諾軒嘅合照，兩人都着住社民連嘅 T 恤，吳文遠仲喺貼文中寫「黨員不斷增加中」、「社民連重返立法會」、「社記唯一區議員」等。唔通社民連終於成功游說區諾軒入黨？
純粹着嚟響應吓
話說區諾軒喺舊年退出白鴿黨時，承認社民連曾經有搵過佢入黨，不過就話當時只係講笑性質。尋日吳文遠發貼，兩人合照唔止同樣穿着社民連衫，仲齊齊擺埋同一個 Post （姿勢），驟眼睇兩個人仲有啲似樣添！唔通雙方已達成共識，社民連終於喺議會後繼有人？
區諾軒回覆時就話，尋日同社民連參加五一遊行，純粹「攞件Tee着響應吓」，並唔係加入任何政黨，重申唔會輕言入黨，獨立係佢團結民主派最好嘅位置咁話。