政情：高鼎國望更多酒店落成 合理房價吸客
內地一連三日嘅五一假期結束，雖然遊客多咗，但本港嘅零售業變差。家族做腕錶品牌生意嘅香港鐘表業總會前主席高鼎國（Geoffrey）就話佢哋提早經歷咗旺季，兩個星期前係最忙嘅一個時段嘞，又話酒店爆晒棚嘅旅遊旺季，對佢哋嘅生意反而冇着數，呢個講法都幾有趣喎。
最忙嘅時段非旅遊旺季
Geoffrey解釋話，由於佢哋主打嘅錶價一萬元以下，呢類消費者會喺酒店房價相對合理嘅時間嚟港消費，所以兩個旺季之間嘅檔期就係佢哋嘅最忙時段喇！講講吓，佢笑稱如果香港起多啲酒店，令房價再平啲、合理啲，咁就好嘞！
Geoffrey嘅爸爸、上海總會副理事長高叔平睇見生意紅火，梗係開心笑晒喇！記得佢曾經形容自己係個仔「背後嘅男人」，事關Geoffrey忙於參與社團活動同社會公益，令佢冇得退休，但依家Geoffrey咁勤力睇實盤生意，佢應該冇「投訴」喇！