政情：黃碧雲不滿骨灰龕政策 促扣陳肇始人工
立法會今日繼續審議《二○一八年撥款條例草案》，立法會主席梁君彥早前批准泛民提出六十五項修正案，據知泛民一如既往不滿問責高官表現要削減佢哋薪酬，當中有十項修正案涉及扣減十名問責高官人工，大部分都係被要求削減全年人工，至於被點名扣一個月三十多萬元人工只有兩人，分別係食物及衞生局局長陳肇始及環境局局長黃錦星。
指唔設永久龕位做法擾民
提出削減陳肇始一個月人工嘅民主黨立法會議員黃碧雲話，自己唔滿意當局嘅公營骨灰龕位安排，特別係以後唔設永久骨灰龕位，每十年須續期嘅做法擾民，佢同時批評，當局唔應該喺冇公眾諮詢嘅情況下改變政策，不過，衡量埋陳肇始其他工作表現，決定只係提出削減陳一個月人工。
至於其他被泛民點名要削減人工嘅問責高官，包括特首林鄭月娥、政務司司長張建宗、律政司司長鄭若驊、教育局局長楊潤雄等。