中環出更：立會重遇班主任 何啟明「肥咗一截」
經常都有學校參觀立法會，勞工界議員何啟明早前就遇到佢喺九龍華仁書院時嘅班主任同一班師弟。佢話見到當年教英文嘅班主任，對方保養得好好，廿年如一日，但係佢就被班主任笑肥咗一截，班主任仲對佢做咗議員覺得好意外喎。
何啟明話早排班主任帶學生到立法會，仲發短訊通知佢，佢收到後就即刻去打招呼。班主任話，冇諗到當年畢業後去讀教育文憑嘅何啟明，最終會做議員。咁點解何啟明會唔教書，走咗去從政呢？佢就話因為讀完教育文憑後，去一間男校實習，班學生實在太曳，令佢覺得教書太難、太痛苦，所以就決定轉行，後來輾轉做咗議員助理，依家仲做埋議員添！
當年班上最高
佢仲摷番張一九九七年喺九華讀中一時嘅舊相出嚟，當年班主任都喺度，佢仲話自己係班上最高嘅男生之一。咁依家係咪真係肥咗一截？大家就自行定奪喇！
卓妮