政情：補選開支 蔡東洲每票$8.3
立法會四席補選喺上月中完結，四名新議員亦已上任，陸續有參選人向選舉事務處遞交選舉開支。九龍西區無黨派參選人蔡東洲喺整個選舉花費二萬三千零九十九蚊五毫，按其獲得二千七百九十五票計算，即每票花約八個三。
根據申報，蔡東洲印製一百條橫額，共花一萬六千蚊，另外雜項使咗近七千一百蚊，包括六百九十蚊買索帶，同埋六張食環署代為清拆違規橫額嘅罰單，涉款共接近六千五百蚊。
陳學鋒零開支
另外，中西區區議會副主席陳學鋒一度盛傳參加港島區補選，佢亦遞交選舉開支申報表，但冇任何開支款項。