房屋問題嚴重困擾香港人，連特首林鄭月娥都慨嘆買唔起樓。本來呢，基層可以透過申請公屋實現上樓心願，點知港府房屋政策混亂，尤其係「綠置居」將公屋數量封頂，申請人無端端被插隊，排極都上唔到樓，唔嬲就假。
呢，尋日就有團體去到深水埗綠置居地盤抗議，反對政府將綠置居恒常化，話房委會將二千五百個新公屋單位轉做綠置居出售，即係剝奪公屋輪候冊入面二十八萬申請者嘅上樓機會，同喺乞兒兜搶飯食冇乜分別嘅咋。
又難怪抗議人士咁嬲嘅，大家有眼見，輪候公屋嗰條人龍仲長過萬里長城，三年上樓承諾早成夢幻泡影，家陣平均上樓時間長達四點七年，有人甚至等足六年、十年都冇份。以為新公屋落成可以加快上樓啦，點知港府唔該都冇聲就攞嚟做綠置居發售，點會唔絕望吖。當局話就話綠置居只准公屋租戶購買，買樓後會騰空原來單位畀輪候人士，唔影響公屋供應，弊在公屋供應並無增加，講到天花龍鳳都只不過係數字遊戲咋。難為港府仲好意思將綠置居單位撥入公屋數量計算，為公屋落成量唔達標篤數，簡直豈有此理。你話吖，港府見錢開眼，連資助房屋都攞嚟賣錢，基層遲遲上唔到樓又有乜出奇。
屋漏偏逢連夜雨，土地供應專責小組話未來八年嘅土地荒問題將會極之嚴峻，事關所有熟地已經用晒，生地變成熟地閒閒哋等十年八載，加上劃地審批程序費時失事，換言之公屋輪候時間勢必進一步延長。最激氣係港府唔敢觸動權貴利益，對社會要求收回私人遊樂場用地嘅呼聲置若罔聞，但又無力擺平反對填海嘅阻力，土地荒愈演愈烈有乜出奇。有政黨要求港府將軍事用地列入土地供應選項喎，嘥氣喇，港府無能成咁，邊敢咁做吖。
不過咪睇港府呻地從何來呻到樹葉落，其實有人冇屋住嘅同時，一樣有屋冇人住。呢，食環署喺港九新界合共有成萬呎閒置街市宿舍，其中鄰近港鐵站嘅油麻地街市宿舍面積達四千幾平方呎，偏偏當局寧願丟空養老鼠都唔收回建屋，簡直暴殄天物。所以話啫，高官開口埋口「寸土必爭」、「見縫插針」，講到喺香港搵塊地起樓仲難過上太空咁款，實情佢哋先至係浪費土地資源嘅大嘥鬼呀。
睇到喇，無殼蝸牛望穿秋水都上唔到樓，搞到要住喺危機四伏嘅劏房甚至豬欄，唔係政府拓土建屋不力，點使咁吖，無能港府認真好帶挈。林鄭仲成日讚自己「好打得」，簡直唔知醜字點寫，計功夫茶話齋，佢極其量係「好吹得」咋。