政情：陪大女去台灣交流 陳沛然做埋「軍醫」
今時今日好多中小學都會舉辦各地嘅交流團，其中立法會醫學界議員陳沛然（Pierre）最近就陪佢個大女去咗台灣。不過佢就唔單止係陪咁簡單，仲係今次交流團嘅義工家長，即係做「軍醫」，可謂責任重大！Pierre仲話好多家長趁小朋友上堂時可以出去玩吓，但佢就要留守負責睇住啲小朋友，冇份出去玩，真係可憐喇！
成團300人得一個醫生 「講起都驚」
唔好以為Pierre從醫多年，做「軍醫」對佢嚟講係駕輕就熟。事關今次個交流團，全級師生加埋家長有成三百幾人，但醫療團隊就得三個人，醫生更加係得佢一個，直言「講起自己都覺得驚」。
不過睇嚟佢都準備充足，仲喺Facebook叫網友估下佢個醫療包入面有啲乜？只係網友認為佢只係帶咗糖果、零食、Board games（圖版遊戲）等。當然唔係糖果喇！佢個醫療包總共有二十七樣嘢，包括血壓計同啲藥，佢仲話去到台灣第一日就有小朋友發燒，「軍醫」要即刻出動嘞！