政情：區選撞區 本土泛民「爭崩頭」

區議會議席被視為立法會選舉嘅樁腳，就算打個折扣，點都會有一定選票，加上本土自決派喺立法會選舉止步，就更加要搶佔區議會議席，否則冇固定票源又冇話語權，隨時被陰乾。

三本土派爭撼鄭泳舜

據了解，政圈流傳嘅民主派協調名單，喺九龍西補選進身立法會嘅鄭泳舜，其所屬嘅深水埗區議會南昌北選區，最少有三個本土派有意出戰，包括學聯前秘書長李軒朗、大專政關嘅郭偉誠同盧德昌。未知到底佢哋真係覺得自己喺該區有勝算，定係特登消費一個知名度高嘅人，嚟賺取知名度嘞！

除咗本土派鬼打鬼外，進步民主派同傳統泛民派都出現撞區，曾與立法會前議員劉慧卿合組名單出選一二年立法會新界東選舉嘅民主黨柯耀林，佢係西貢廣明區前議員，但嚟緊區選就想轉區再戰，打算出選將軍澳市中心一個新選區，但新同盟都打算派出秦海城出選，民主黨同新同盟勢必又起爭拗。到底係前區議員有優勢抑或係銳意擴大西貢影響力嘅新同盟會爭贏呢？

泛民內部出現撞區嘅，仲有已加入「社區前進」嘅工黨前主席胡穗珊打算出戰油麻地南，但公民黨嘅伍僥敏亦希望出戰，唔知新團體爭唔爭得贏公民黨嘞！而荃灣西站附近一個新選區，民主黨易承聰同公民黨孔令暉都想出選，最後邊個可以出線都係未知之數。

譚爾培獲戴耀廷「死亡之吻」？

值得留意嘅係大埔區議會西貢北選區，事關大學生譚爾培獲佔領行動發起人、港大法律系副教授戴耀廷推薦，譚爾培正考慮出選，而佢暫時係唯一一個獲戴耀廷推薦嘅人。到底背負住呢個推薦係咪有助出線甚或當選，抑或變成「死亡之吻」？大家拭目以待喇！