中環出更：跟張建宗返工 學生隨時冇得收工
唔知今時今日有幾多學生嘅夢想係做官呢？政務司司長張建宗尋日發表網誌，指會喺扶貧委員會嘅「友‧導向」師友計劃下，推出「與司局長同行」計劃，畀啲中四、中五學生喺嚟緊暑假跟住政府司局長返一日工，仲話三司十三局都會參加，但張建宗出咗名係一個工作狂，睇怕學生跟住佢做一日，可能冇得收工。
朝早五點半做到夜晚
張建宗以前做勞工及福利局局長嘅時候成九年冇放過假，全部年假都畀晒政府。佢仲話過每日清晨五點半就起身做嘢。至於問到幾點收工？佢就話唔睇鐘，夜晚九點放工返到屋企食完飯都會繼續做。咁啲工作流程，試問跟佢嘅學生會點？咪係有開工冇收工，做餐飽囉！
不過並唔係每個司局長都係鐵人嚟嘅，如果學生係跟住現任勞福局局長羅致光返一日工，話唔定幾歎都唔定，事關羅致光通常六點幾就會收工，六點九已經算遲走，仲話過「自己唔放工，下屬可能唔敢走」添！唔知參加計劃嘅學生想體驗極長工時嘅官員生活，定係準時收工嘅理想工作多啲呢？
卓妮