中環出更：肥老闆險「塞爆」飛行器入口
三十多名來自立法會多個黨派嘅議員，尋日早上喺廣州參觀一間智能技術飛行公司，現場有容納單人及雙人嘅自動載人飛行器，供一眾議員試坐，其中人稱「肥老闆」嘅金融服務界張華峰，體重逾二百五十磅，噸位十足，險塞着單人飛行器入口位，幸好喺其他議員協助下成功入內，一嘗做「機師」滋味，期間民主黨黃碧雲更高叫「試飛、試飛」，似乎「未出發，先興奮」。
肥老闆之後再接再厲挑戰雙人機，經過一輪努力後成功上機，隨後新民黨容海恩登上飛行器同肥老闆為鄰，一批議員起哄要求二人關門合照時，肥老闆即時讚好，搞gag稱「關埋門洞房」，令到容海恩哭笑不得，直言「唔好啦啩」。
泛民主派方面，黃碧雲同黨友、高人一等嘅林卓廷都有試坐飛行器，當黃碧雲成功入內後，一批建制派議員疑向黃碧雲開玩笑，笑言應困着黃，其後更有人建議應立即起飛添！
杜拜「飛天的士」防塞車
據報呢間研發載人飛行器嘅公司，尚未於內地正式投產，現時有單人機及雙人機兩種，其中單人機一部要二十萬美元，折合約一百五十六萬港元，可以承載重量為一百公斤，而雙人機一部要二十五萬美元，折合約近二百萬港元，可以承載重量為二百三十公斤。
翻查資料顯示，中東國家阿聯酋杜拜為了解決交通擠塞問題，去年底已試飛全球首架無人駕駛「飛天的士」，正如有議員喺今次參觀後形容載人飛行器具革命性，民建聯葛珮帆等多名議員都要「打卡」同飛行器拍照留念，未知近年號稱着力發展創新科技嘅香港，會唔會引入類似載人飛行器，並將之變身為市中心內新嘅交通工具，成為推動香港旅遊業新嘅引擎？
卓妮