政情：支聯會選址驚青 設六四紀念館無期

支聯會主席何俊仁尋日喺「六四紀念館」專題展覽記者會上就話，佢哋依家為購買新物業作紀念館已籌得七百萬至八百萬港元，希望可以買到面積約一千平方呎嘅地方，屆時唔止可以做展覽，仲可以播放影片同搞研討會，最好就有地方可以設個圖書館咁話，真係要求多多。

既怕負債 又憂「摸頂」

佢又話之前睇咗唔少商場、商廈單位，但啱心水嘅就相當貴，有啲夠錢支付嘅又唔太啱，希望有多啲儲備，咁樣選擇多啲，又唔使負債，直言有二千萬至三千萬港元就易解決好多。但佢又提到有朋友話擔心佢哋「摸頂」，左顧右盼咁，設立紀念館一事都唔知幾時先成事喇！

對於早前全國人大常委譚耀宗話，支聯會口號「結束一黨專政」可能違憲，何俊仁話「左派噏多啲都唔係壞事」，話唔定幫咗佢哋叫多啲人出席六四晚會添！今年嘅六四紀念館專題展覽以「六四解碼——改革開放四十年與六四」為主題，由今日起至六月十日喺石硤尾賽馬會創意藝術中心舉行，除咗展出有關六四嘅已解密檔案，亦有關於內地經濟發展等展板。