政情：雙學眾志立會止步 博入區會

黃之鋒戰海怡西 袁嘉蔚選田灣

多名本土自決派人士喺前年立法會換屆選舉當選，包括當時成為史上最年輕立法會議員嘅羅冠聰、小麗民主教室嘅劉小麗、新界西直選「票王」朱凱廸等人，但自從前年十月青年新政游蕙禎同梁頌恆嘅宣誓辱華風波，導致前後合共六人被DQ，包括羅冠聰同劉小麗，加上眾志常委周庭今年初報名參選港島區補選被DQ，理由係眾志主張「民主自決」違反《基本法》，由於自決派喺立法會之路已遭「封殺」，惟有轉而去區選一試身手。

據政界流傳嘅泛民協調區選名單，除咗外界廣泛流傳嘅眾志秘書長黃之鋒出戰南區海怡西，硬撼新民黨現任區議員陳家珮，同埋袁嘉蔚或首次打正眾志旗號參選南區田灣選區之外，多個泛民組織料首次派人參選，包括預料同朱凱廸拍住上簡稱「廸辦」嘅人士，預料係香港本土毛孟靜支持者嘅「毛辦」人士，以及聯繫簡稱為「小麗」嘅劉小麗支持者。

「廸辦」最積極 岑敖暉選八鄉北

究竟以「廸辦」、「毛辦」同「小麗」聯繫表態參加泛民協調嘅有幾多人？據聞依次有十八人、八人同五人，其中以「廸辦」最為積極，絕大部分集結在新界西，並喺元朗駐重兵，合共派出十人，包括喺一四年違法佔中後知名度大增嘅岑敖暉，佢擬挑戰八鄉北現任區議員，至於學聯前秘書長陳樹暉亦有意喺元朗嘅一個新選區落場練兵。

至於「毛辦」同「小麗」人腳，各自圍繞毛孟靜、劉小麗喺九龍西嘅根據地拓展地區工作，明眼人都睇得出無論勝負，勢必係二人未來嘅堅實地區樁腳，而劉小麗支持嘅疑似參選人，最少有一人擁有選戰經驗，該人就係八年前以「大專2012」身份參選一○年五區補選嘅黃永志，聽聞佢有意喺油尖旺搵區參選。

一句到尾，政界關注DQ風暴會唔會由立法會層面延伸至區議會選舉層面，自決派同「雙學」代表「變身」代表唔同組織或牌頭，喺考慮有否勝算前，首要係成功「入閘」確認區選參選人資格，否則都係嘥心機，一切純屬無意義嘅紙上談兵。