中環出更：馬逢國一套「踢死兔」着30年
立法會體育、演藝、文化及出版界議員馬逢國早前出席電影界一個頒獎典禮，仲隆重其事着咗套「踢死兔」行紅地氈添，認真型仔。馬逢國就話嗰套「踢死兔」已經買咗成三十年，因為曾經有一段時間肥咗，太太就同佢講不如掉咗呢啲舊衫喇，不過佢就堅持唔掉，因為佢覺得自己一定可以變瘦，到時實會着得番喎。
食少啲減咗30幾磅
馬逢國話自己之前好肥，最高峰時有一百九十九磅，後來先至減番三十幾磅，依家有一百五十至一百六十磅。佢話有啲人認為做運動就可以減肥，其實最重要嘅「秘訣」係得三個字，就係「食少啲」，而食少啲都有學問，唔係唔食乜唔食物，而係要持續每餐都食少啲。
佢又舉例話，以前佢可以自己食成條叉燒，餐餐食兩碗飯，依家食叉燒只食三、四片，每餐只食大半碗飯。佢仲話最初為咗飽肚，會煮蔬菜濃湯，飲兩大碗，除咗飽肚，亦可以增加纖維咁話。
卓妮