喺一六年立法會選舉、一七年特首選委會選舉中，屬民主派嘅參選人喺建築、測量、都市規劃及園境界（建築界）中均能勝出，而且得票率亦唔低。建築界嘅選民來自四個界別嘅學會，甚至係該界別嘅專業會員先可成為選民。有消息指，有園境師學會會員提出動議，要求取消準會員喺周年大會上嘅投票權，若動議獲通過，該批準會員亦將會失去喺立法會同特首選委選舉嘅投票權。
現時園境師學會分為退休會員、資深會員、專業會員同準會員，四種會員均具有投票權。據了解，有七名園境師學會嘅會員提出動議，要求取消準會員喺周年大會上嘅投票權，佢哋指出，截至上月底，準會員嘅數目為一百五十九人，而其餘屬退休、資深同專業會員人數約為二百一十五人。動議嘅會員認為現時準會員嘅人數不斷上升，而且已佔會員總人數近四成三，擔心準會員或會主導該會。
近年民主派喺建築界嘅選舉中均能勝出，唔少人認為同年輕人參與選舉有關。現時要成為園境師學會嘅準會員，只須具備相關學歷，而佢哋若要成為專業會員，須要通過專業試同有足夠工作經驗，因此唔少年輕會員屬準會員類別。但由於園境師行業當中，未必須具園境師牌照先可接工作，因此有部分準會員係具有工作經驗、但未考取牌照嘅人士。
園境師學會將於本月二十七日舉行周年大會，據了解喺當日會議上，將討論修章嘅動議，而下月二十五日將就動議投票。