政情：洪為民初入職IT 人工一年加兩次
唔少畢業生搵第一份工都好着重人工有幾多錢，「創新香港」榮譽主席洪為民（Witman）尋日出席介紹「創新香港——國際人才嘉年華」嘅記者會時就講起，自己喺八十年代做嘅第一份工係寫程式，人工只係得三千五百蚊，當時人工都可以接受，但就低過做政府好多，因為做政府都有成七千至八千蚊o架！
咦？咁又走去做私人公司嘅？Witman話當年入政府雖然人工高啲，但二十幾年都升唔到做助理署長，加上當年科技部門又好似被人歧視咁，同樣係大學畢業，但人工比其他政府部門低一級，私人公司起薪點雖然較低，但喺嗰個年代冇乜人識IT，老闆好怕人才流失，一年加兩次人工，入行一年多，人工已經兩萬，而當年嘅IT人都好受靚女歡迎，成日有女仔打嚟問電腦，仲有同事成日被人叫做PC王子添！
話搵工最緊要睇前景
Witman覺得搵工最緊要睇前景，沙士嘅時候，有啲讀電腦嘅大學畢業生去咗賣寬頻計劃，未能加入創科公司，幾年冇做後，本身識嘅科技知識已未能與時並進，似乎都有啲浪費自己所學嘅。