中環出更：眾志三子借屍還魂返立會
香港眾志主席羅冠聰喺舊年七月被取消議員資格（DQ），而眾志常委周庭報名參選立法會港島區補選未能出閘被DQ，理由係眾志嘅「民主自決」主張被指違反《基本法》，最終要由民主派區諾軒作為「Plan B」並當選，最新消息指眾志終於「成功」進身議會，但就係「借屍還魂」。
區諾軒聘做議助地區幹事
究竟眾志點解入到立法會？咪就係區諾軒出手，聘請羅冠聰、周庭為議員助理，至於眾志秘書長黃之鋒則任區諾軒地區辦事處幹事。換言之，眾志三子攞正牌隨時可以喺立法會游走。
冇政黨背景嘅區諾軒，一直被指與眾志眉來眼去，特別係周庭被DQ後，區諾軒頂上參選港島補選，而於補選期間，眾志核心羅冠聰、周庭同黃之鋒全程陪伴左右，區諾軒上月當選議員已事先張揚，會聘請眾志成員擔任議辦職員，最終羅冠聰、周庭喺立法會層面協助區諾軒，至於黃之鋒則喺南區海怡擔任地區幹事。
卓妮