政情：長衫過百件 陳淑芝割愛義賣
沉寂過一段時日，長衫近年又再進入女士衣櫃當中，紫荊青年商會會務顧問陳淑芝（Cammie）自爆有過百件長衫。但香港居住空間矜貴，點處置咁多長衫都幾費煞思量。Cammie就選擇拎啲長衫去義賣，唔只幫社企籌款，仲可以將長衫文化傳揚開去咁話。
大談長衫演變
Cammie三年前結識咗一班長衫愛好者後，就深受優雅嘅長衫吸引，不時添置長衫以便日常穿着。不過好多長衫都只係着咗一兩次，啲長衫仲非常新淨，如打入冷宮未免太可惜。於是佢就開咗間小店，將自己同姊妹捐出嘅長衫義賣，為社企籌募資金，仲可以順便以較低廉嘅價格向大眾推廣長衫文化。
Cammie又話，長衫呢種傳統衣着亦會隨時代而演變，譬如今日嘅改良型長衫，為方便穿着已由拉鏈取代繩鈕，布料亦不限於絲綢或織錦，就連牛仔布同窗簾布亦會採用。不過古舊嘅長衫始終有其價值，因為係老師傅一針一線嘅巧手工藝。佢又話，曾聽過有客人丟棄一件九十多年歷史嘅舊長衫，佢都大感可惜喎。