中環出更：黎衍橋三億追夢 「中國芯」揚名國際
最近中港錶界有喜事，香港表廠商會（商會）名譽會長黎衍橋成功研發嘅首個中國製造手錶機芯，早前取得德國天文台嘅認證，成為中國第一個達到天文台級數嘅錶芯。咁開心，商會名譽會長蘇永強及會長林偉雄等錶界人士早前拉隊去一睹為快。黎衍橋就笑自己攞咁多錢出嚟追夢，冇乜正常人會做喎！
黎衍橋話，依家所有手錶品牌都要同瑞士買機芯，當年佢就心諗，點解唔設計一個有自主品牌嘅機芯，咁就唔使受制於人。佢前後使咗接近三億元，終於研發出第一個「中國芯」，笑言香港人替中國鐘錶業創造呢個歷史係香港人嘅驕傲，依家進一步躋身天文台錶行列，達至鐘錶精湛工藝嘅極致，可以話係喜上加喜。
誤差小 躋身天文台錶行列
所謂天文台錶係指機械錶嘅每日誤差，德國天文台嘅標準比國際標準更嚴格，每日誤差係負三點八秒、正五點八秒，仲要通過七個項目及三個唔同溫度嘅測試先至合格。咁嚴謹，難怪蘇永強話要打打氣先得。佢又話，依家鐘錶生意唔易做，傳統錶受到智能手錶嘅衝擊，市場正受到侵蝕，所以好似黎衍橋咁，唔淨止掛住賺錢，仲繼續追求理想嘅錶佬好抵讚。
同場仲有「國產錶王」董觀明、黎衍橋個仔Ricky及商會會董冼偉權。董觀明前年捐咗五百萬元畀兩個城中鐘錶商會用於培訓業界人才，對行業發展都好有心。幾年前開始返公司幫手嘅Ricky，現時主要負責品牌推廣，佢都自創一個韓國潮牌手錶品牌，專攻年輕人市場。
卓妮