防波堤安全成疑 路政署誠信破產

面對輿論強烈質疑「狗牙狀」防波堤有問題，路政署署長同首席政府工程師拍晒胸口，猛咁話安全同結構冇問題，海堤冇移位，隧道沉管冇滲水、冇裂紋喎，但有土木及結構工程師就唔係咁樂觀嘞，認為防波堤扭工字塊應該係左右互相緊扣咁擺至啱，但依家嘅係上下扣排列，啲水一沖埋嚟，扭工字塊就會被水力拉走，唔只防唔到波，仲影響埋船隻航行安全添；又話依家扭工字塊擺放凌亂，潮漲嗰陣已經被水浸晒，根本發揮唔到防禦海浪嘅作用咁話，真係完全唔畀面，大摑政府嘴巴。

講真，港珠澳大橋作為使咗成千億嘅大型跨境基建項目，由施工開始已經問題多多，造成多名工人死亡，因此被譏為「奈何橋」呢一筆唔講，就講一時人工島移位，一時崩堤，一時石屎檢測數據造假，甩甩漏漏多到三日三夜都講唔完，你話市民點會有信心吖。好不容易大橋建完，就嚟通車嘞，失驚無神又被人影到防波堤成個「狗牙狀」，萬一通車時出事，後悔都遲咯。退一萬步講，就算防波堤設計真係冇問題，政府官員呢回冇講大話，但點解仍然被人質疑？原因就係，政府不嬲講大話當食生菜，好似童話故事《狼來了》入面嗰個鍾意信口開河嘅男仔咁，到咗講真話嗰陣，想搵個人信都難啦。

話時話，政府講大話實在係上晒癮，好似高鐵工程嚴重延誤超支，但運房局、路政署開頭一味隱瞞，實在瞞不過就巧言令色，話乜鬼「疑中留情」喎，講大話已經講到一啲都唔面紅嘅境界，即係無恥喇。再講鉛水危機吖，政府又係用一個大話冚一個大話。就連林鄭本身都係一個反口覆舌之輩，佢曾經大大聲話退休，話唔會選特首，到頭來咪一個屈尾十走出嚟選，仲連「聽到上帝聲音」咁嘅藉口都噏得出，唔到你唔服。上樑不正下樑歪，捲入僭建醜聞嘅律政司司長鄭若驊，亦係一個大話精。你話啦，呢個政府說話做事不盡不實，唔講大話好似會死人咁，你叫市民點信得過佢哋吖。

一句講晒，政府靠得住，豬乸會上樹。高官誠信破產，講到天花龍鳳都冇人再信，大橋、高鐵呢啲基建工程安全與否，大家一定要𥄫到實吖。