政情：愛犬唔開心 林顥伊想搵動物傳心師
唔少人都熱愛動物，百仁基金副主席林顥伊（Evelyn）都係狗主，仲身體力行成立愛護動物組織，為動物發聲。社會上對於動物傳心師有唔少質疑，擔心係騙財嘅方法，Evelyn就話雖然佢就未試過，不過都有意去試吓搵動物傳心師幫手。
當聽多個意見
Evelyn話，佢年紀最大嘅一隻愛犬已經有十歲，開始出現情緒問題，估計愛犬係因為身體開始有毛病，所以冇以前咁開心，故此佢都有興趣搵動物傳心師幫手，希望了解吓愛犬嘅情況。佢又話，身邊嘅朋友對動物傳心師有兩極嘅睇法，自己就因為未試過，都唔知動物傳心師係咪可靠，不過當係聽多個意見都唔係壞事嚟嘅。
Evelyn屋企其實養咗四隻狗，不過佢就唔覺得照顧狗狗好吃力，因為屋企人會一齊照顧喎。佢又話自己晚晚都會同愛犬齊齊瞓，而佢哋都各有瞓開嘅位置，所以唔會出現爭位瞓嘅情況。