中環出更:邵家輝諷李卓人 唔喺議會有原因

公務員事務局早前將延長公務員退休年齡嘅諮詢文件上載,並展開為期兩個月諮詢,而職工盟就去信立法會公務員及資助機構員工事務委員會主席,要求召開公聽會並延長本月底屆滿嘅諮詢期,其中批發及零售界議員邵家輝就表明反對,點名批評職工盟秘書長李卓人做唔到議員係有原因。

斥職工盟拖延諮詢 罔顧工人利益

有關委員會尋日開會討論職工盟嘅建議,邵家輝話對有關建議感到莫名其妙,因為市場缺人,而且亦有公務員為養家表明期望延長退休年齡,形容係好多港人嘅期望。佢仲話,有關建議只係供公務員選擇係咪延長退休年齡,並非強迫性,唔明白點解有人想拖延。

邵家輝之後就詢問職工盟代表係邊個,然後又話李卓人係職工盟代表,但已經唔喺議會,直指李卓人咁樣代表工人,「梗係唔喺(議會)度」,希望有關建議不用再拖,盡快落實。加上多名建制派議員反對召開公聽會,最終主席潘兆平表明不考慮召開公聽會。

卓妮

第一手消息請下載on.cc東網iPhone/iPad/Android/Windows Phone Apps