政情：審議一地兩檢法案葉劉嫌進度龜速
立法會《廣深港高鐵（一地兩檢）條例草案》委員會尋日開會，主席葉劉淑儀喺會議開始前先大呻，指委員會已開咗會成兩個月，加埋已經召開咗十次會議同兩次公聽會，討論原則同政策用咗十七個鐘，審議草案詳題又用咗六個鐘，形容進度「龜速」，講明之後會加速開會。
首輪發言提問減至3分鐘
葉劉話以目前「龜速」進度，擔心去到年底都未能完成審議，預告會嚴格控制會議時間，並立刻將議員第一輪發言及提問時間由之前嘅五分鐘縮減至三分鐘。多名民主派議員隨即表示不滿，新民主同盟范國威就將「龜速」責任推畀官員，指官員表現「龜縮」，唔肯清楚交代高鐵經濟效益同法理基礎，先搞到進度落後，但係葉劉重申「我已經決定咗」，維持首輪三分鐘時間嘅決定。
會上民主派繼續就一地兩檢安排提出各種假設性質疑，結果兩個鐘嘅會議，仍未傾完草案嘅導言部分。有鑑於上星期二委員會因法定人數不足而流會，葉劉尋日完會前不忘提醒委員下次開會係今個星期五朝早，叫佢哋記得準時出席。