政情:又想翻兜新西梁耀忠交棒成疑

未來兩年係選舉年,建制派密密培訓新星出台,相反民主派就有唔少「大佬」仍然在任,未見有交棒嘅迹象。年初街工立法會議員梁耀忠(阿忠)被指想「永續參選」,搞到爆出退黨潮,現時街工連埋阿忠只剩下三位區議員。不過,阿忠就呼冤話自己唔係「馮檢基2.0」,相反已經準備好立法會交棒喎。不過,阿忠口口聲聲話交棒,但奇怪佢提出嘅意向仍然包括後年立法會換屆選舉「翻兜」參選新界西直選,令人質疑佢係咪有心交棒。

「永續參選」 惹新血不滿退黨

街工原本有五名區議員,包括阿忠、黃潤達、梁志成、周偉雄同梁錦威。不過,年初有指阿忠向黨友暗示想繼續參選後年立法會選舉,除咗競逐連任區議會(二)功能界別(超區)外,或是「翻兜」再選新界西地區直選,搞到班新血極度不滿,周偉雄同梁錦威先後退黨,更有人將阿忠與民協馮檢基(阿基)作比較。阿忠強調,自己同阿基好唔同,暗指阿基仲係有心參選,但佢就其實做唔做都可以,一定唔係「馮檢基2.0」喎。

阿忠又透露,目前街工有兩位社區主任已經喺天水圍開始地區工作,帶街工衝出葵青區,有望將區議會版圖擴大。佢仲話,近年唔少活動都會拉埋街工內年輕一輩落場,目的都係想佢哋可以認識多啲人,實牙實齒話真係做好交棒準備。咁佢後年立法會換屆仲選唔選?阿忠坦言目前咩都未定,有好多個組合都可以發生,例如自己選新界西、黨友去選超區,甚至決定放棄連任去幫黨友抬轎都未定。至於明年區議會換屆選舉,佢話相信好大機會繼續參選。

雖然阿忠口口聲聲話做好立法會交棒準備,但佢提出嘅參選意向中,都無排除過「翻兜」新界西直選,難怪政界猜測佢因為前年主持立法會主席選舉時臨陣退縮做逃兵,因而得罪民主派支持者,所以要重返新界西老巢出戰。阿忠打地區戰無疑夠晒紮實,連建制派早前空降嘅小花都自覺勝算低而打退堂鼓,但講到參選立法會就不復當年勇,存在隱憂,即使「翻兜」參選新界西亦未必穩操勝券,倒不如決心交棒,相信仲可以光榮引退。

第一手消息請下載on.cc東網iPhone/iPad/Android/Windows Phone Apps