中環出更：樹根接班人？ 葛珮帆「恨鋼不成鐵」
前立法會議員鍾樹根曾自創「子烏虛有」、「明張目膽」等為人熟悉嘅四字詞語，成為議會中嘅「金句王」，雖然樹根已經唔喺議會，但佢嘅黨友、立法會議員葛珮帆（EQ）就承傳咗佢嘅「創新精神」，喺尋日嘅立法會財務委員會上大講「恨鋼不成鐵」。EQ仲要喺同事提醒下，先知自己講錯嘢，真係𤓓喇。
財委會尋日討論環境保護署開設助理署長常額職位，唔少議員對政府嘅環保政策都好有意見。一向重視環保嘅EQ當然非常着緊，佢就話對環保署開位係絕對支持，但政府唔少環保政策同計劃都係無疾而終，甚至係唔知做緊乜，所以今次係痛苦嘅決定。
同事提醒先知講錯
EQ又點名批評「綠在區區」計劃，又話其他計劃亦令人失望，更形容係「恨鋼不成鐵」，希望政府做到實際工作。EQ說畢已有唔少議員竊竊私語，但佢自己就冇發現。
環境局副局長謝展寰其後作出回應，EQ亦繼續跟進問題，但一開口就話自己「好似講錯嘢」，因為有同事提醒，佢將「恨鐵不成鋼」講錯成「恨鋼不成鐵」。EQ得以及時更正，真係要多謝同事喇。
卓妮