甘地講過，「一個地方嘅道德水平如何，看它如何對待動物即可。」照咁睇，香港嘅道德水平都幾墮落，事關虐待動物慘劇不時發生，淨係呢幾日咋，先有銀狐犬被擲落街分屍慘死，後有烏龜墮樓斃命，沒有最殘忍，只有更殘忍，你話香港係咪道德淪喪吖？
無獨有偶，呢兩單慘劇都發生於長沙灣同一幢大廈，都咪話唔弔詭，當中銀狐犬幾日前先至遭冷血之徒擲落海獲救，無奈最終都係逃唔過鬼門關；點知尋日同一地點再有兩隻烏龜受害，有冇再離譜啲吖。兇徒將動物當成出氣袋，點止冇人性吖，連獸性都冇，但本港保護動物條例天殘地缺，同樣難辭其咎。枉香港自詡文明城市喎，枉部分香港人批評內地人食狗肉唔文明喎，其實都係五十步笑百步嘅咋。
嗱，目前本港主要靠《防止殘酷對待動物條例》懲罰兇徒，最高監禁三年及罰款二十萬元，可惜法庭往往輕判，唔係罰社會服務令，就係判入獄幾個月，根本冇阻嚇力。至於其他相關法例如《野生動物保護條例》、《動物羈留所條例》等等，名堂雖然唔少，花款可謂多多，弊在政出多門，不切實際，結果兇徒繼續逍遙，動物繼續受害。好多團體都要求港府成立動物警察及完善法例，偏偏當局借咗聾耳陳隻耳扮聽唔到，你話係咪幫兇吖？
港府唔重視動物權益，大家都有眼見咯，不過諗落都冇乜出奇，莫講話動物吖，香港人嘅權益又何曾被港府重視過呢？唔係咩，港府庫房滿瀉，本來可以放水造福基層，但港產官僚嫌貧愛富，善財難捨，結果基層市民依然生活喺水深火熱之中，單係五個港人一個窮已證明一切。仲有喎，港府帶頭虐童兼虐老，睇吓幾多兒童慘遭毒手、幾多長者老無所依咪知囉。難為高官口口聲聲搞咩安老社區、增加託兒服務、宿位零輪候、一校一社工，吹到天花龍鳳，咪又係無一落實。有人話香港係悲情城市，真係冇講錯o架。
話時話，港府雖然刻薄自己人咋，但對外人就好到加零一，尤其係擺明攞着數兼靠害嗰啲，更加係百般討好唯恐不及，講緊嘅之唔係南亞假難民囉。呢，家陣有多達一萬五千個假難民滯留本港，港府淨係今年已豪花十四億元招呼佢哋，幾年下來使咗成五十億元嘞，名副其實好食好住好招待，係咪恨死香港人同一班貓貓狗狗先？
最諷刺嘅係，林鄭早前大大聲批評環保團體反對填海「幫海出聲」阻住地球轉喎，計功夫茶話齋，港府一味幫假難民出聲，出錢出力打官司，都唔肯瞄港人及小動物一眼，比狼心狗肺更不堪，有乜資格話人吖！