政情：今日你上鏡：勇於面對挑戰 湯恩佳凍熱都唔怕

香港近年夏天愈嚟愈熱，冬天亦偶爾會有寒流襲港，唔少人都好唔習慣呢啲咁極端嘅天氣o架！早前喺一個活動見到孔教學院院長湯恩佳同家人，湯恩佳話自己唔怕凍、又唔怕熱，而且佢游冬泳都已經游咗超過六十年添！聽落真係相當厲害，到底有乜嘢秘訣，可以抵抗極凍同極熱嘅天氣呢？湯恩佳話最緊要係知道凍，但係唔驚凍；知道熱，但係唔驚熱，咁樣同做人嘅態度一樣，要面對挑戰，唔好逃避。呢種做人嘅態度，真係唔容易學到呀！