中環出更：行管會大嘥鬼 拒議員翻用DQ六子物資
青年新政游蕙禎、梁頌恆、社民連梁國雄、香港眾志羅冠聰、姚松炎同劉小麗先後被取消立法會議員資格（DQ）。但有人爆料，話有議員諗住慳錢兼環保，想用番DQ六子剩落嚟嘅物資，點知就被拒絕，覺得好無奈咁話。
我哋收到料，有議員打算用番被DQ咗嘅議員嘅物資，點知就碰釘。立法會秘書處接受查詢時回覆，話立法會行政管理委員會已入稟追討游、梁兩人已獲發嘅議員酬金及預支嘅營運開支，但其餘四人嘅議員酬金及營運開支事宜，包括點處理佢哋喺今屆立法會購置，並已獲發還開支嘅資本項目就有待行管會決定。
扣住唔放遲早變垃圾
立法會議員卸任後，佢哋喺立法會大樓辦公室以公帑購買嘅物資如果唔自己買番，通常都會交番畀立法會秘書處處理。曾經有行管會成員透露，立法會搵環保回收商回收卸任議員物資都使唔少錢。
其實有議員接手DQ六子嘅物資已經係最直接嘅循環再用。但行管會扣住啲物資唔放，DQ六子嘅嘢遲早變晒廢物喇！
卓妮