假難民無法無天 小市民冇覺好瞓

嗱，連保安局都承認現時仍有一萬五千名假難民滯港，當中好大部分就係等候上訴嘅個案，港府話就話有提供人道援助，之但係得雞碎咁多錢，點夠佢哋開飯吖，結果唔係勾連黑幫作奸犯科，就係攞住行街紙打黑工。淨係尋日咋，旺角發生蠱惑偷車事件，有人訛稱遺下泊車票喺車內，向停車場職員要求攞車匙，大模廝樣揸走人哋架車，咪就係無惡不作嘅南亞兵團所為囉。

再講黑工問題吖，保安局最近三年數字顯示，持行街紙非華裔人士涉嫌做黑工被捕嘅多達九百一十五人，即係每日平均有零點八人被捕，單係舊年就拘捕咗三百八十一人，較前年勁升兩成六，入境處仲出動咗七百五十幾次，較前年增加兩成七，話係疲於奔命都冇誇張。講真，黑工問題無日無之，長掃長有，警方尋日就喺元朗拘捕兩名南亞聲請漢黑工，漏網之魚就更加多添。

執法部門做到索晒氣，可惜都係治標唔治本，講到底咪就係拜「完善」嘅司法制度所賜囉。大家有眼見，假難民嘅聲請就算被拒絕，佢哋仍可提出上訴；就算上訴被駁回，佢哋仲可以提出司法覆核；就算走完所有法律程序被遣返，佢哋仲可以食過翻尋味再次來港，有啲假難民滯港長達十幾年就係咁解。呢，今年港府用於假難民嘅開支高達十四億元，五年下來足足用咗近五十億元，夠起七千個公屋單位嘞，你話係咪勞民傷財吖？

真係諗極唔明，到底司法制度係保障香港人，定係保障假難民？官老爺開口埋口假難民人權，咁香港人嘅人權又有邊個理？好明顯喇，假難民來港呃飲呃食事小，仲姦淫擄掠、打家劫舍乜都齊事大。日前有個偷渡入境嘅巴籍漢，為咗賴死居然自稱塔利班，唔到你唔服，之但係唔怕一萬最怕萬一，如果真係有恐怖分子藉假難民身份潛入本港，咁就大鑊嘞。印度籍嘅極度重犯文子星就係例子，佢仲要攞埋香港身份證添，點到市民唔驚呀。

睇到喇，假難民無法無天，小市民冇覺好瞓，就知香港自詡法治之區係幾咁虛偽。有人話港府效婦人之仁變成助紂為虐，司法獨大淪為司法禍港，真係冇講錯o架，再唔退出國際公約或重設禁閉營，香港遲早變成塔利班大本營都似！