「好打得」、「好有執行力」、「好識Connect」嘅特首林鄭月娥，原來至叻嘅真身係「好推得」。看官，老朽之所以有此睇法，絕非無的放矢。早前林鄭公開向民主黨豪捐三萬大洋，仲喺官方Ig貼上「大和解」，事件惹來政界極大反響，凌厲嘅直指佢敵友不分，冷嘲嘅斥其政治智慧零蛋，熱諷嘅話三萬咁少點和解？人哋收黑金都四千萬啦！
一個連八達通也不知怎麼拍才可入閘、冇廁紙不知可用面紙解決日常生活所困嘅特首，偶然行為出現些少偏差，有時確係可以原諒嘅，我哋習慣形容呢種行為叫「小事糊塗，大事精明」，或者叫「小疵不足以損大器，短疢不足以累長才」。然則，林鄭的「小事糊塗」亦可作如是觀乎？
被各方炮轟嘅林鄭，終於開腔說出「大和解」真相，哦！原來錯在特首辦內下屬「自作主張」。佢當晚捐款三萬元屬於「人性化、友情行為」。
下屬真的可以在官方網上平台「自作主張」？如果個下屬好玩嘢，今次就話加咗「大和解」啫，下次如果加上「支持港獨」豈不大鑊？屆時再推諉下屬「自作主張」就未必過到關；當然，「好推得」嘅林鄭或者會話係「上帝意思」，只好代上帝講聲「唔好意思」咯，冇心o架！
林鄭以「勤政」見稱，據稱是工作狂，做嘢常做到三更燈火五更雞，之不過勤政並不代表你優秀。工作再努力，但方向錯了也是白搭。老朽想起自縊身亡嘅明朝崇禎皇帝，終年僅三十三歲；據記載，佢廿幾歲已有白頭髮、眼角長魚尾紋，就係晝夜不分的勤於政事所致，更難得的是，佢勇於認錯，單係《罪己詔》都寫了六次。勤政加埋肯認錯都做了亡國之君，一味諉過於人又剛愎自用者，即使「好有執行力」又如何？加上滿朝文武多廢柴，胡亂放生，亂咁派錢，婦人之仁，香港能長治久安乎？