政情：變冇殼蝸牛 范國威嚇到問老婆
四名新當選立法會議員嘅利益申報曝光，民建聯鄭泳舜同新民主同盟范國威均報稱冇物業，屬無殼蝸牛，誰知報道出街後，范國威即嚇一跳，急問老婆發生乜嘢事？原來佢係有殼嘅，即係有自住物業。
范國威話喺上屆立法會亦有申報持有自住物業，但喺今次申報中，助理係根據申報表中註釋其中一項，即「議員無須登記他在本港有的唯一或主要常性自住的居所，除非該居所亦為該議員帶來收入」，於是幫佢申報咗冇持有物業，而喺相關報道出街後，佢睇見自己變咗無殼蝸牛都嚇一驚，即刻打電話問老婆發生乜嘢事？佢話為咗安全起見，稍後會補番申報喎。
民主派區諾軒則由補選時申報居住於觀塘，最新申報持有西貢一個住宅物業，據報區諾軒係代家人持有物業，唔係住喺西貢。至於建築、測量、都市規劃及園境界謝偉銓持有港島區兩個住宅物業，係四名議員新丁中擁有最多磚頭。
區諾軒衝擊跌倒獲贈腰封
話說區諾軒日前喺立法會《廣深港高鐵（一地兩檢）條例草案》委員會衝擊時不慎跌倒，其腰部撞到會議室梯階。適逢議會陣線今午公布，區諾軒和新同盟范國威將加入該組織，二人並獲組織成員送贈禮物，當中區諾軒獲人民力量陳志全贈送腰封，保護腰部。