政情：高官政界二代又行埋 青委會恐難發圍

港府尋日公布升格由政務司司長張建宗任主席嘅青年發展委員會名單，包括三十四名非官方委員，任期由四月一日起至二○二○年三月底，當中有十多人由青年事務委員會過渡至青委會，包括華人置業集團主席劉鳴煒、香港青年聯會現任主席郭永亮同前任主席霍啟剛、民建聯荃灣區議員林琳、工聯會元朗區議員姚國威等。

「三業三政」嘅建議都係「阿媽係女人」

至於新獲委任加入青委會嘅委員，政界除咗泛民唯一上榜嘅民主黨大律師吳思諾外，亦有政界二代或前高官嘅蹤影，包括來自經民聯梁君彥嘅兒子梁宏正、現為自由黨中西區區議員嘅教育局前政治助理楊哲安、現為港大醫學院院長嘅食物及衞生局前副局長梁卓偉等人。另外較為人熟悉嘅係前電視台主播盤翠瑩、人稱「牛丸」嘅東方龍獅足球隊前主教練陳婉婷，另有三名新任委員係經自薦方式加入。

雖然吳思諾接受查詢時，唔認同自己係因為政界二代先獲垂青加入青委會，但事實擺在眼前，今次青委會連同上周公布嘅特首創新及策略發展顧問團名單，呢個已經係政府短期內兩個高層次委員會，毫不避忌同政商界二代「行埋」，其中唔少人一早已被現行諮詢架構吸納，加上青年事務委員會於最後一次會議發表嘅報告，涉及青年「三業三政」嘅建議都係「阿媽係女人」，若然青委會按照呢個報告去開展工作，睇怕都係得個吉居多。

一句到尾，查實無論創新、青年發展等事宜，民間社會時有真知灼見，只係政府很多時都視而不見，政府與其花盡心思去同政商界二代「行埋」，倒不如耳聽八方，廣開言路，呢個先係打破依家諮詢，以至收集意見脫離民情嘅不二法門。