中環出更：肥彭被黨友痛斥 想港有民主多過英國
過去陰魂不散「回魂」指指點點嘅末代港督彭定康（肥彭），因英國脫歐一事後欄失火，同黨友爆發罵戰，肥彭更被翻舊帳，遭抨擊想香港有民主，多過英國有民主。
如無意外，一年後英國將正式脫歐，英國政界支持脫歐及留歐派繼續針鋒相對，今次於保守黨內發生，主角係被指屬於留歐派嘅肥彭，同屬於脫歐派嘅黨友莫格（Jacob Rees-Mogg）。肥彭首先批評脫歐派係教條主義，視意識形態較國家利益更為重要，佢之後更批評已相識四十年嘅莫格，狠批對方嘅見識未見長進，並遭到個人形象所束縛。
被翻對香港差勁舊帳
莫格其後反擊，狠批肥彭「輸打贏要」，唔尊重英國脫歐公投結果，隨後更連消帶打，揭出末代港督肥彭於香港嘅差勁舊帳，就係當年肥彭一邊嘗試為香港帶來民主，但可悲嘅係，原來對方根本唔想英國民主。查實肥彭指指點點亂噏，過去都時有發生，今次因英國脫歐一事遭到猛烈抨擊，甚至互相人身攻擊一番，唔知呢啲係咪玩嘢玩得太多，終歸後欄失火收場。
卓妮