中環出更：立會外撞車受阻 謝偉俊調停講到扯火
尋日立法會外發生交通意見，話說尋日中午十二時許，一輛由姓張（六十六歲）司機駕駛嘅七人車，沿中環添美道往龍和道行駛，至立法會道迴旋處時，與鄰線一輛由姓方（四十三歲）司機駕駛的的士碰撞，兩車僅輕微損毀，冇人受傷，兩名司機隨即下車理論，互指不是。
由於兩車橫亘行車線，夏慤道轉入添美道嘅車輛無法通過，有司機不斷響號，亦有救護車受阻，出現長長車龍。
勸唔聽 斥司機「唔好塞住晒」
咁啱有「法律超人」之稱嘅立法會議員謝偉俊（Paul）由司機駕駛七人車接載離開立法會，座駕亦被困車龍中，佢見到兩架涉事車阻路，按捺不住落車了解情況。
阿Paul先係向兩名司機查問有冇報警，但兩名司機就「你推我讓」，阿Paul好自然就發揮其律師嘅本色向司機解釋，指交通意外無人受傷，可以拍照後，將車輛駛到路旁處理，但兩名司機仍然唔肯報警，佢登時怒火中燒話：「有冇搞錯！」更斥司機「唔好塞住晒啲車」。
事件擾攘廿分鐘，兩名司機先各自將車駛離同報警，條路開通咗，條車龍亦慢慢消失，阿Paul亦得以離去。據悉，警員到場了解後，兩名司機和解收場。
卓妮