財政預算案派糖派到民怨載道，派錢又派到怨氣沖天，最可惡係，港府呢頭小恩小惠，小打小鬧，嗰頭一個屈尾十，又透過公共事業加價嘅手法收番去，市民啱啱甜下嘴巴又冇嘞。講緊嘅，咪就係港鐵又要加價囉！
港鐵舊年雖然凍結票價，不過蟄伏一年又出手喇，「追加」埋舊年剩餘加幅，港鐵今年有機會加價超過百分之三，亦超過好多打工仔嘅加薪幅度。最弊係，港鐵加完，其他私人運輸機構又會唔執輸，你加我又加，百物騰貴就梗o架嘞，升斗市民本來已經衣食住行樣樣難，如今百上加斤，你話點笑得出啊，香港快樂指數想唔低都難啦！
話時話，交通支出早已成為香港市民嘅沉重負擔，有調查指香港上班族每月交通支出佔咗人工比例高達百分之五，部分更高逾一成，都咪話唔嚇人。交通費貴成咁，逼到人抖唔到氣不特止，更刺激部分年輕人鋌而走險，動腦筋玩蠱惑添！
呢，本報日前報道，有唔少年輕人使用長者八達通搭港鐵，事關長者八達通有每程兩元優惠，而學生八達通只享車費半價優待，而且不論用長者八達通定學生八達通過閘機，都係着起同樣嘅「特惠票價」燈號，一般人根本無法識別。再講吖，買長者八達通唔使身份證明，港鐵巡查又不足，即係變相引人犯罪，有個案更加聲言靠住咁樣嘅方法，五年嚟一共慳咗超過兩萬元車錢，但期間只係被人捉過兩次，合共罰款一千，根本冇阻嚇力。政策有咁大嘅漏洞，值博率咁高，難怪唔少年輕人躍躍欲試，反正舊年施政報告提出嘅交通津貼計劃優惠得雞碎咁多，索性自行批出另類交通津貼，由納稅人埋單，問你死未？
冇錯，年輕人玩蠱惑不僅道德有虧，仲有違法之嫌，絕對不值得鼓勵，但轉頭諗一諗，如果唔係交通費太重皮，有幾多人願意咁做呢？仲有喎，港府坐擁金山銀山，窮得只剩下錢，但講到扶貧紓困就耍手擰頭，牙痛咁聲，不過講到公共事業加價就唔知幾果斷，單係一個港鐵票價「可加可減」機制淪為「只加不減」機制，就知道呢個政府幾咁涼薄，幾咁漠視民困，年輕人使用長者八達通呃錢係唔啱，但某程度上都係逼上梁山嘅啫。
所以話，上樑不正下樑歪，講到玩蠱惑，年輕人又點同港產官僚揮吖。早前預算案建議為明年文憑試考生代交考試費，結果好多人都話要參加考試，唔係貪好玩，而係藉機發洩憤怒，香港無日安寧，講到底都係無能兼涼薄嘅港府造成！